Psa 116 | WSK | STEP | Ani Kari Biya ko kuesam, mu awuk, ani nu aninga sangukko aurem, se agiring ikiam ale gomang aisam.

Psalms 116

Kari Kaem nu saongam bare ko nu amilmiloso ko den

1 Ani Kari Biya ko kuesam, mu awuk, ani nu aninga sangukko aurem, se agiring ikiam ale gomang aisam.

2 Nu aninga aira ikiam ale aga saongam,

mu ko ani ali imi te bagasam mu ani nu aru ngatanguru se bagirikko.

3 Aninga angamang bataga niara tawun biya aga iram,

ani kua namirikko lage te ware.

4 Se ani Kari Biya nup te aurem,

“O Kari Biya, aga sangaruko!” maem.

5 Kari Biya nu munan nuam, gomang tua ko duap,

anananga Kaem nu ninguru nanga kueso.

6 Nu kari kotam mena mu nunga sangarso.

Se ani memek kuring ningi bare nu aninga saongam.

7 Aninga angamang kutek maukko,

mu awuk, Kari Biya ani ago ko yawarakala se.

8 O Kari Biya, ani memek ningi bare ni aninga bataguru taem ale ni aninga amononge siwurem ale aninga sangem se me dagulem.

9 Buta se ani ali imi te bagasam mu tom suen biya Kari Biya ilak wete aolak iluwasam.

10 Tom ani ikup aga iram se ani balem “memek tawur bo” maem, bare ani Kari Biya ko angamang ningi nunguning.

11 Tom ani balem, “Kari suen biya kawel kari” maem, ale nguangakasam, bare ani am Kari Biya ko angamang ningi nunguning bagakasam.

12 Kari Biya nu ani ago ko yawarakala beteram.

Se anape mel te nu tama bita tuekko?

13 Ani waen gi ago tairik ale Kari Biya aga saongam mu ko munan tuekko.

14 Ko kariimet nomotam te ani anapeya mel tuekko balem mu tuekko.

15 Kari Biya ko kariimet ninguru nunga kueso,

se ningi bo kueso mu nu mel yam ko ma me balso.

16 O Biya, ani nika ura kari,

aninga ayam bitakaso iwitatala ani ka nip patowasam.

Ani mayang singir aga taliparam, bare ni bataguru guila warem.

17 Ani munan amilmil kisek ale nip patawirikko.

18 Nika kariimet nomokete, Jerusalem ka tempel ningi, kuwim kako mu te, ani anapeya mel kisekko balem mu kisekkowo.

Se Kari Biya nup patowaralko. Aleluya!